М. АСРОРӢ БО НАМОЯНДАГОНИ ИТТИҲОДИ ТОҶИКОНИ ВИЛОЯТИ ПЕРМ ВОХӮРД

                  Душанбе, 22 апрел. (АМИТ «Ховар», Лутфия Эшонқулова).- Имрӯз, 22 апрел вазири фарҳанги ҶТ Мирзошоҳрух Асрорӣ намояндагони тоҷикони Федератсияи Русияро бо роҳбарии раиси иттиҳоди тоҷикони вилояти Перм Сайфиддин Одинаев ба ҳузур пазируфт.                  Зимни сӯҳбат вазири фарҳанг зикр намуд, ки вазорат ҳамаҷониба маркази навташкили фарҳанги тоҷикони вилоятро дасгирӣ намуда, ба он китобҳои гуногун ва парчам тақдим менамояд.                   Ӯ қайд кард, ки Вазорати фарҳанг баҳри сайқал додани донишомӯзии 10 нафар донишҷӯёни тоҷик, ки дар коллеҷи хореографии вилояти Перм таҳсил мекунанд низ омода аст, кӯмак намояд.                   Намояндагони тоҷикони Русия миннатдории худро ба вазир баён намуда, баҳри рушду такмили ҳамкориҳои минбаъда байни иттиҳоди тоҷикони вилояти Перми ФР ва Вазорати фарҳанги ҶТ иқдоми нахустин гузоштанд.                   Дар ин бора ба мухбири АМИТ «Ховар» аз маркази матбуотии Вазорати фарҳанги ҶТ хабар доданд.