МАЙДОНИ ҶАНГАЛЗОРҲО ВАСЕЪ МЕГАРДАД

                 Душанбе, 20 апрел. (АМИТ «Ховар», Лаззат Диловарзод).- Дар семоҳаи соли 2009 майдони ҷангалзорҳои нав бунёд кардашуда ба 877 гектар расонида шудааст.                 Дар ин бора аз Кумитаи ҳифзи муҳити зист ба мухбири АМИТ «Ховар» иттилоъ доданд.                 Алҳол майдони ҷангалзорҳои ҷумҳурӣ ба 12 ҳазору 50 гектар расонида шудааст. Нигоҳубини ҷангалзорҳоро дар ҷумҳурӣ Муассисаи давлатии хоҷагии ҷангал ва шикори Кумитаи ҳифзи муҳити зист таъмин менамояд.                 Дар соли 2009 аз ҳисоби тухмии «арчаи зарафшонӣ» дар майдони 40,6 гектар ниҳолхонаҳо ташкил карда шшуда, парвариши ин навъи арчаро ба роҳ мондаанд.                  Дар хоҷагиҳои ҷангали ҷумҳурӣ 2млн. 236 ҳазору 390 бех ниҳолҳои мевадиҳанда, сояафкан ва ороишӣ парвариш меёбанд.