МУҲОКИМАИ МАСЪАЛАҲОИ ТАЙЁРӢ БА МАВСИМИ ТИРАМОҲУ ЗИМИСТОН

                Душанбе, 2 апрел. (АМИТ «Ховар», Наргис Бояхмедова). — Сарвазири Ҷумҳурии Тоҷикистон О.Оқилов дирӯз дар масъалаи омода сохтани соҳаҳои гуногуни иқтисодиёти мамлакат ба мавсими тирамоҳу зимистони солҳои 2009 — 2010 бо роҳбарон ва кормандони масъули вазорату идораҳои ҷумҳурӣ машварат гузаронд. Дар он нақшаи тадбирҳои сари вақт омода сохтани соҳаҳои иқтисодию иҷтимоӣ ба кори муттасилу самарабахш дар фаслҳои тирамоҳу зимистон муҳокима шуданд. Қайд карда шуд, ки зиёда аз 60 фоизи маҳсулоти умумии дохилии кишвар дар ҳамин мавсим истеҳсол карда мешавад.               О.Оқилов дастурҳои Сарвари давлат Эмомалӣ Раҳмонро дар маҷлиси 31 март баргузоргардидаи Ҳукумат ёдовар шуда, изҳор намуд, ки вазорату идораҳои дахлдор бояд дар асоси онҳо тадбирҳои самарабахш андешанд. Иштирокчиёни машварат пешниҳодҳо ва мулоҳизаҳояшонро роҷеъ ба ин масъала баён намуданд.