МУЛОҚОТИ ДУХТУРОНИ САРАТОНШИНОС ДАР ДУШАНБЕ

                   Душанбе, 9 апрел. (АМИТ «Ховар», Ибодат Давлатова ). — Субҳи имрӯз дар Душанбе маҷлиси 30 — уми Иттиҳоди директорони пажӯҳишгоҳҳо ва марказҳои саратоншиносӣ, таҳқиқи шуои радиатсионӣ ва рентгенологии мамлакаҳои ИДМ кушода шуд. Дар он 16 нафар роҳбарони муассисаҳои илмӣ ва олимони соҳа ширкат меварзанд. Маҷлисро раиси Академияи илмҳои тиббии Русия, директори Донишгоҳи давлатии Маркази илмии саратоншиносии Федератсияи Русия ба номи Н.Блохин Михаил Давидов кушод.                   Масъалаи асосии рӯзномаи маҷлис баррасии масъалаҳои тайёрӣ ба анҷумани 6 — уми саратоншиносони ИДМ мебошад, ки соли 2010 дар Душанбе баргузор мегардад. Дар маҷлис инчунин, проблемаҳои соҳаи саратоншиносии Тоҷикистон баррасӣ карда мешаванд. Қайд карда шуд, ки Ҳукумати Тоҷикистон барои табобати бемориҳои саратон тадбирҳои самарабахш меандешад. Барои ин тадқиқоти васеи илмӣ ба роҳ монда шудааст. Дар Тоҷикистон мисли мамлакатҳои дигари ҷаҳон тамоили афзоиши бемории саратон мушоҳида мешавад.                   Мухбири АМИТ «Ховар» хабар медиҳад, ки иштирокчиёни маҷлис имрӯз дар Донишгоҳи давлатии тиббии ба номи Абӯалӣ ибни Сино дар конфронси илмӣ ширкат меварзанд.