НАМОИШНОМАИ «СӮҲОНИ ҚАЗО» ДАР ДАНҒАРА

                   Душанбе, 24 апрел. (АМИТ «Ховар»,Лутфия Эшонқулова).- 23 апрел дар саҳнаи Театри ҷумҳуриявии мусиқӣ-драмавии ноҳияи Данғара намоишномаи «Сӯҳони қазо»-и драматурги шинохта Абдуғаффори Абдуҷаббор баргузор гардид.                   Тавре ба мухбири АМИТ «Ховар» дар Вазорати фарҳанги ҶТ хабар доданд, намоишномаи мазкур аз рӯи достони «Саломон ва Абсол»-и Абуалӣ Ибни Сино гирифта шудааст. Ишқ, хиёнат, тахтпарастӣ ва ҷангу сулҳ аз мавзӯҳои асосии намоишнома буд.                   Намоишнома писанди тамошобинон гардида, дар ҷамъбаст аҳли ҳунармандонро зери кафкӯбиҳои бардавом гусел карданд.                  Бояд ёдрас шуд, ки таҳияи якуми асар соли 1995 дар театри шаҳри Конибодом сурат гирифта, он маротибаи дуюм дар шаҳри Душанбе соли 1999 ба саҳна гузошта шуда буд.