ОБИ ҶАВ (ПИВО)-И «БАЛТИКА» ТО НУҚТАИ САВДО НАРАСИД

                  Душанбе, 22 апрел. (АМИТ «Ховар», Лаззат Диловарзод).- Кормандони Раёсати гумруки вилояти Суғд ҳангоми азназаргузаронии бори автомашинаи тамғаи «КАМАЗ-5320», ки ронанда-истиқоматкунандаи ноҳияи Бобоҷон Ғафуров Абдуҳофиз Тоҷибоев мехост маводи истеъмолии воридоташ ба ҷумхурӣ мамнӯи оби ҷав (пиво)-и навъи «Балтика» -ро бо миқдори 8 ҳазору 240 қуттӣ ворид намояд, дастгир намуданд.                  Тафтишот нишон дод, ки ин маводи нӯшокии спиртӣ ба истиқоматкунандаи шаҳри Хуҷанд М.Мирсоҳибов тааллуқ дошта, мехост бо роҳи қочоқ беш аз 13 ҳазор сомонӣ ба даст орад, аммо тираш ба нишон нарасид. Кормандони раёсати мазкур нисбати қочоқчиён парвада оид ба қонунвайронкунии маъмурӣ кушода, соҳиби бор М.Мирсоҳибовро ба андозаи 6 ҳазору 500 сомонӣ ҷарима бастанд. Аз қочоқчӣ М.Мирсоҳибов ҳамчунин арзиши гумрукӣ ба андозаи 5 ҳазору 800 сомонӣ рӯёнида шуд.  Ронанда Абдуҳафиз Ҳоҷибоев низ ба ҷавобгарии маъмурӣ кашидашудааст. Дигар паҳлӯҳои қазия низ тафтиш карда мешавад.