ПСС ҶТ ҲАМКОРИРО БО ХОРИҶИ КИШВАР ГУСТАРИШ МЕДИҲАД

                Душанбе, 13 апрел. (АМИТ «Ховар», Бекназари Абӯбакр). — Даромади Палатаи савдо ва саноати Ҷумҳурии Тоҷикистон (ПСС ҶТ) аз ҳисоби хизматрасонӣ дар 3 моҳи соли ҷорӣ 754 ҳазор сомониро ташкил дод, ки аз нақша 76,8 ҳазор сомонӣ зиёд мебошад. Ин нуқтаро имрӯз зимни нишасти матбуотӣ раиси ПСС ҶТ Шариф Саид ба хабарнигорон иттилоъ дод.                 Ӯ афзуд, ки то 1-уми апрели соли равон ПСС бо 182 палатаҳои ИДМ ва дигар давлатҳои хориҷӣ созишнома баста, фаъолияти намояндагии палатаро дар 44 кишвар ба роҳ монд.                 Мавриди зикр аст, ки бо дастгирии ПСС дар Тоҷикистон Ассотсиатсияи нишонаҳои мол (штрих код) «GS1-Тоҷикистон» таъсис дода шуд, ки имрӯз маҳсулоти Тоҷикистон бо нишони махсуси худ ба бозори ҷаҳонӣ бароварда мешавад. Ассотсиатсияи мазкур ба аъзогии Ташкилоти байналмилалии GS1 қабул гардидааст.                 Инчунин, дар назди Палата Маркази дастгирии ҳуқуқӣ оид ба рушди институти судҳои ҳакамии тиҷоратӣ фаъолият мекунад, ки дар ҳалли масъалаҳои шартномавии аъзоёни палата ва ширкатҳои тиҷоратӣ мусоидат мекунад.