ВИЛОЯТИ СУҒД БА ИДИ ВАҲДАТИ МИЛЛӢ ОМОДАГИИ ҶИДДӢ МЕГИРАД

                   Душанбе, 10 апрел. (АМИТ «Ховар», Бекназари Абӯбакр). — Барои таҷлил ва баргузории чорабиниҳои фарҳангии Рўзи Ваҳдати миллии умумиҷумҳуриявӣ, ки дар шаҳри Хуҷанд баргузор мегардад, 141 ҳазор сомонӣ ҷудо шуд. Дар ин бора раиси вилояти Суғд Қоҳир Расулзода қарор ба имзо расонид.                   Аз маркази иттилоот ва таҳлили дастгоҳи раиси вилоят ба мухбири АМИТ «Ховар» иттилоъ доданд, ки тантанаҳои умумиҷумҳуриявии Рўзи Ваҳдати миллии Тоҷикистон бо пешниҳоди Сарвари Давлат Эмомалӣ Раҳмон даҳаи сеюми моҳи июни соли ҷорӣ дар маркази вилояти Суғд — шаҳри Хуҷанд бо ширкати меҳмонони олимақом баргузор хоҳад шуд.                 Дар назар аст, ки дар доираи таҷлили ин сана як қатор иншооти ҷашнӣ, аз ҷумлаи литсеи президентӣ дар шаҳри Чкалов, чойхонаи миллӣ дар «Боғи Ваҳдати миллӣ»-и ноҳияи Бобоҷон Ғафуров, хонаҳои баландошёнаи истиқоматӣ дар шаҳри Хуҷанд ва амсоли инҳо мавриди истифода қарор гиранд.