ЮСУФУ ЗУЛАЙХО БА ДУШАНБЕ МЕОЯНД?

                 Душанбе, 25 апрел.(АМИТ «Ховар», Марзия Саидова).-Ҳайати қаҳрамонҳои филми бисёрсериягии «Юсуф — паёмбар» таҳти роҳбарии коргардони филми мазкур Фараҷҷӯлоҳи Салоҳшӯр ба Душанбе меояд. Дар ин хусус, масъули бахши матбуоти Сафорати Эрон дар Душанбе Алиризо Ороста ба АМИТ «Ховар» иттилоъ дод.                 Филми мазкур, ки тавассути шабакаҳои телевизионии Тоҷикистон намоиш дода мешавад, дар байни мардуми тоҷик маҳбубияти бузург касб намудааст.                 Филми «Юсуф -паёмбар» дар қисмати ҷанубии Эрон бо иштироки ҳунармандони ин кишвар наворбардорӣ гардидааст. Ғояи асосии филм афзалияти ишқи илоҳӣ нисбат ба ишқи инсонӣ аст.  Ҳамзамон дар он китоби муқаддаси осмонӣ — Қуръони карим тафсир гардида, шахсияти паёмбар — Юсуф, фазилатҳои неку барҷастаи инсонӣ, низоми давлатдорӣ, рушди иқтисод, ҳамзистӣ дар осоиштагӣ, муросо, фазои солими муҳити хонаводагӣ таҷассуми худро ёфтааст.                Дар филм нақшҳои Юсуф паёмбарро Имон Хусравӣ 7-сола, Сайидҳусейни Ҷаъфарии 12 -сола ва Мустафо Замонии 27-сола бо истеъдоди баланди ҳунарӣ иҷро намудаанд. Ҳунарпешаи шинохтаи бахши синамои Эрон Касоёни Риёҳӣ нақши Зулайхоро бо назокати хоса ва маҳорати баланд бозидааст.