5 ҲАЗОР ГЕКТАР ЗАМИН ДАР ВОСЕЪ ЗАРАР ДИД

                       Мӯъминобод, 14 май. (АМИТ «Ховар», Сулаймон Холов). — Дар натиҷаи номусоид омадани обу ҳаво ва боридани боронҳои пай дар пай дар ноҳияи Восеъ 3 000 гектар заминҳои кишти пахта ва 2 000 гектар заминҳои ғалладонагию сабзавот зарари ҷиддӣ диданд.                       Тавре сардори раёсати кишоварзии ноҳия Сайҳомид Саидов гуфт, бештар зарари ҷиддӣ дар ҷамоати Меҳнатобод ба қайд гирифта шудааст, ки беш аз 100 гектар заминҳои кишоварзиро шуста бурдааст. Ба гуфтаи ин манбаъ то ҳанӯз маблағи зарари расида аз офати табиӣ маълум набошад ҳам, вале дар ин самт ҳукумати ноҳия қарор қабул намудааст, ки дар ноҳия ситод ташкил карда шуда, Кумитаи ҳолатҳои фавқулоддаи ноҳия, идораи суғурта, омор ва ҷамоатҳои шаҳраку деҳот аз рӯи шароит ба хоҷагиҳои деҳқоние, ки аз ин офат осеб дидаанд ёрии амалӣ расонанд.                        Бояд қайд намуд, ки офати табиӣ ба ғайр аз заминҳои кишоварзӣ 15 хонаи истиқоматӣ, 1 кашар ва участкаҳои наздиҳавлигии аҳолӣ зарари ҷиддӣ дидаанд. Дар заминҳои кишоварзие, ки дар натиҷаи ин офат зарар дидаанд кишти такрорӣ гузаронида хоҳад шуд, гуфт Сайдаҳмад Саидов.