ЧОРАБИНИИ САРИВАҚТӢ

                      Бадахшон, 8 май. (АМИТ «Ховар», Лутфишо Додо).- Дар вохӯрии директори генералии ЮНЕСКО бо Президенти кишвар пешниҳод шуд, ки Қалъаи Ямчуни ноҳияи Ишкошим ба феҳрасти умумиҷаҳонӣ ворид гардад. Тавре номзади илмҳои таърих, декани факултаи таърихи Донишгоҳи давлатии шаҳри Хоруғ Алоҳуддин Шоҳинбеков иттилоъ дод, дар китоби олими шинохта А.Д. Бобоев «Дижҳои кӯҳани Вахон» омадааст, ки дижи Ямчун дар қарни 2-юми қабл аз мелод бунёд ёфтаасту, то асри VII милодӣ, яъне то паҳншавии Ислом дар ин ҷо соҳибони диж салтанат доштанд. Дижи Ямчунро аз санг бунёд кардаанд.  Ба ин нигоҳ накарда, бо мурури замон деворҳои он хеле хароб шудаанд. Фикр мекунам, ки ин тадбир саривақтист, зеро агар 2 соли дигар ин диж таъмир нашавад, шояд ба пуррагӣ нобуд мегардад.