КАСБИ ЗАРГАРӢ АЗ НАВ ЭҲЁ МЕГАРДАД

                    Душанбе, 8 май. (АМИТ «Ховар», Лаззат Диловарзод),- Дар маҷлиси навбатии Ҳукумати ҷумҳурӣ «Барномаи рушди соҳаи заргарӣ ва коркарди сангҳои қимматбаҳо ва ороишӣ барои солҳои 2009- 2015» тасдиқ шуд.                     Дар мавриди барномаи мазкур таъкид гардид, ки дар доираи татбиқи ин барнома 10 корхонаи нав бунёд карда шавад. Айни ҳол дар ҷумҳурӣ 5 корхонаи коркарди сангҳои кимматбаҳо фаъолият менамояд.                    Президенти кишвар дастур дод, ки баҳри ривоҷу равнақи ин соҳа кадрҳои баландихтисос тайёр карда шавад.                     Санъати заргарии тоҷик таърихи беш аз 1000 — сола дорад. Аз нав эҳё намудани он ёде аз санъати ҳазорсола мебошад, ки тавассути он ҳазорон ҷойи нави корӣ пайдо гардида, санъати асили заргарии тоҷик аз нав ба ҷаҳониён муаррифӣ мегардад.