МАҶЛИСИ НАВБАТИИ ШӮРОИ МУДИРОНИ БОНКИ РУШДИ ОСИЁ

                Душанбе, 5 май. (АМИТ «Ховар», Фарангис Раҳимова). — Дар Индонезия маҷлиси ҳарсолаи 42 -юми Шӯрои мудирони Бонки рушди Осиё анҷом ёфт. Дар он бештар аз 3500 нафар, аз ҷумла, вазирони молияи мамлакатҳои Осиё ва ҳавзаи уқёнуси Ором, роҳбарони муассисаҳои тиҷоратӣ, олимон, кормандони воситаҳои ахбори оммавӣ, намояндагони созмонҳои байналхалқӣ ва иттиҳодияҳои шаҳрвандӣ иштирок намуданд. Ҳайати Тоҷикистон дар маҷлиси мазкур таҳти роҳбарии мушовири давлатии президент дар масъалаҳои сиёсати иқтисодӣ Матлубхон Давлатов ширкат варзид. Бояд гуфт, ки М.Давлатов мудири Бонки рушди Осиё дар Тоҷикистон мебошад. Ба ҳайат, инчунин, раиси Бонки миллии мамлакат Шариф Раҳимзода ва вазири мелиоратсия ва захираҳои об Саиди Ёқубзод шомил буданд.            Иштирокчиёни маҷлис дар давоми чор рӯз масъалаҳои марбут ба ёфтани роҳу усулҳои нави кам кардани сатҳи камбизоатӣ ва таъмини рушди устувори иқтисодиро муҳокима карданд.