НАРХҲОИ БОЗОРРО ПАСТ КАРДАН МУМКИН АСТ?

                       Бадахшон, 15 май. (АМИТ «Ховар», Лутфишо Додо).-Имрӯзҳо дар бозори марказии шаҳри Хоруғ ва бозорҳои навоҳии болоби рӯдхонаи Панҷ нархи пиёз аз 4 сомонӣ гузашту картоштаю сабзӣ ба 3 сомонӣ расид. То ҳосили нав он пайваста боло меравад. Суоле ба миён меояд, ки оё дар диёре, ки барои парвариши сабзавот кулли шароитҳо муҳайёанд, нархҳои сабзавотро паст кардан мумкин аст?                     — Бале, мегӯяд коршиноси варзидаи соҳаи кишоварӣ аз ноҳияи Ванҷ Д. Кӯҳканиев Шаҳри Хоруғ ва навоҳии болооби рӯдхонаи Панҷ, ки ба маҳсулоти кишоварзӣ ниёз доранд, метавонанд харидори доимии катошкаю сабзию пиёзи аълосифати ноҳияи Ванҷ бошанд. Аммо ба хотири амалӣ гардидани он кӯшиши тарафайн мебояд. Маъмурияти бозори марказӣ ва дигар бозорҳои вилоят метавонанд дар ин роҳ гоми нахуст гузоранд ва соҳибкоронашро ба сомони ин амал сафарбар намоянд, зеро тирамоҳи ҳар сол ин намуди маҳсулотро соҳибкорони шаҳри Душанбею вилояти Хатлон бо нархи хеле арзон харида мебаранд.                        Чунин ҳамкориро на танҳо ба деҳқонони ноҳияи Ванҷ, балки бо деҳқонони навоҳии Дарвоз, Рӯшон ва Ишкошим низ ба роҳ мондан судбахш аст, иброз доштанд аз идораи кишоварзии вилоят. Агар чунин тадбир пиёда гардонида шавад, нархи маҳсулоти кишоварзӣ дар бозорҳои вилоят ба маротиба поён мефурояд.