СИТОДҲО БАРОИ ПЕШГИРИИ ФАЛОКАТҲОИ ТАБИӢ

                 Душанбе, 5 май. (АМИТ «Ховар», Наталя Михайлова). — Шабонарӯзи гузашта дар натиҷаи боронҳои шадид дар деҳаи Пастихуфи ноҳияи Рӯшон ярч фуромад, дар деҳаи Хики ноҳияи Ванҷ ва мавзеи Кипарин дар километри 21 — уми роҳи мошингарди Хоруғ — Ишкошим сел омад ва дар наздикии деҳаи Дӯствехчи ноҳияи Роштқалъа сангрезии шадид мушоҳида карда шуд. Аз Кумитаи ҳолатҳои фавқулодда ва мудофиаи шаҳрвандии назди Ҳукумати ҷумҳурӣ ба АМИТ «Ховар» хабар доданд, ки дар ин маҳалҳо ситодҳо ташкил карда шуданд. Барои бартараф сохтани оқибати фалокатҳои табиӣ тадбирҳо андешида мешаванд.