ВОРИДОТИ ФУРӮЗОНАКҲОИ ГАРМИДАҲАНДА ЗИНА БА ЗИНА МАНЪ МЕГАРДАД

                      Душанбе, 15 май. (АМИТ «Ховар», Бекназари Абӯбакр). — Меъёри боҷи гумрукии воридоти фурӯзонакҳои гармидиҳанда (фурӯзонакҳои муқаррарии то имрӯз истифодашаванда) ду баробар зиёд карда шуд. Дар ин бора қарори махсуси Ҳукумати Ҷумҳурии Тоҷикистон ба тавсиб расид.                    Қарори мазкур бо мақсади иҷрои дастуру супоришҳои дар Паёми Президенти кишвар Эмомалӣ Раҳмон ба Маҷлиси Олии ҶТ ироа гардида, аз ҷониби Вазорати рушди иқтисод ва савдои ҷумҳурӣ таҳия шудааст.                     Роҳбари раёсати котиботи Вазорати рушди иқтисод ва савдои ҶТ Анвар Латипов ба мухбири АМИТ «Ховар» гуфт, ки ин тасмим бо мақсади иҷрои супориши Сарвари Давлат оид ба зина ба зина манъ кардани воридоти фурӯзонакҳои гармидиҳанда ва гузаштан ба истифодаи сартосарии фурӯзонакҳои каммасраф роҳандозӣ шуда, ба сарфаи нерӯи барқ мусоидат мекунад.                     Мавриди зикр аст, ки қаблан боҷи гумрукии воридоти ин гуна фурӯзонакҳо 5 фоиз буда, аз ин пас ба 10 фоиз баробар шуд.