1 ИЮН РӮЗИ БАЙНАЛМИЛАЛИИ КӮДАКОН

                        Душанбе, 1 июн.(АМИТ "Ховар», Марзия Саидова).- Имрӯз 1 июн дар саросари ҷаҳон Рӯзи байналмилалии кӯдакон таҷлил мегардад. Санаи таҷлили Рӯзи атфол ҳанӯз дар соли 1925 дар анҷумани ҷаҳонии вазъи кӯдак дар Женеваи Швейтсария муқаррар гардида буд.                         1 июн ҳамчун Рӯзи кӯдак бештар дар давлатҳои собиқ коммунистӣ ҷашн гирифта мешавад. Дар бархе аз давлатҳои ҷаҳон бошад асосан 20 — уми ноябр, яъне дар рӯзи қабули эъломияи ҳуқуқи кӯдак ва Аҳдномаи байналмилалии ҳуқуқи кӯдак, ки Рӯзи умумии кӯдакон эълон шудааст, таҷлил мекунанд.                      Дар робита ба ин сана 1 июн дар саросари ҷумҳурӣ чорабиниҳои гуногуни идона, шавқовару фарҳангӣ ва варзишӣ баргузор мешавад. Аз ҷумла, бо ташаббуси Ҳукумати Ҷумҳурии Тоҷикистон, Мақомоти иҷроияи ҳокимияти давлатии шаҳри Душанбе ва Хазинаи хайрияи «Сарпараст» дар муҷтамеи давлатии «Кохи Борбад»-и пойтахт хатнасури 500 нафар кӯдакони оилаҳои камбизоати пойтахт бургузор мешавад, ки он шаҳодати ғамхории Ҳукумати мамлакат ба кӯдакон ва наврасон аст.