ҶАВОНОНИ ХОРУҒ АЗ ҚИСМИ НИЗОМӢ ДИДАН КАРДАНД

                    Хоруғ, 18 июн. (АМИТ «Ховар», Л. Додо). — Дар қисми низомии 01123-и шаҳри Хоруғ мулоқоти хатмкунандагони соли ҷории мактабҳои шаҳр бо афсарону аскарони ин қисми низомӣ баргузор гардид. Наврасон як рӯзи худро дар ин ҷо ба омӯзиши техникаву лавозимоти ҳарбӣ ва мулоқот бо афсарону сарбозон сипарӣ намуданд.                     Комиссари ҳарбии ВМКБ Зафар Давлатов дар сӯҳбат бо ҷавонон тазаккур дод, ки бо фармони вазири мудофиаи кишвар, ҷиҳати омода намудани ҷавонон ба хизмати ҳарбӣ ҳамасола машқҳои низомӣ доир мегарданд, ки ин тадбирҳо имконият медиҳанд то наваскарон ҳангоми хизмат душворӣ накашанд.                     Дар фарҷоми мулоқот ҷавонон ба гурӯҳҳо ҷудо шуда, аз хобгоҳу ошхона, хазинаи нигаҳдории силоҳ ва синфхонаҳои таълимӣ дидан намуда, савори мошинҳои зиреҳпӯш гирди майдончаи қисми низомиро давр заданд.