АНСАМБЛИ «МАВРИГИ»-И БУХОРО ДАР ТОҶИКИСТОН

                  Душанбе, 23 июн. (АМИТ «Ховар», Лутфия Эшонқулова).- Бо ташаббуси Муассисаи давлатии сафарию ҳунарии «Базморо»-и назди Вазорати фарҳанги Ҷумҳурии Тоҷикистон дар шаҳру ноҳияҳои ҷумҳурӣ консерти ансамбли ҳунарии фолклорию этнографии «Мавриги»-и шаҳри Бухорои Ҷумҳурии Ўзбекистон баргузор мегардад.                   Барномаҳои консертӣ 30-юми июни соли равон дар шаҳри Душанбе, ва аз 1-ум то 5-уми июл дар шаҳри Турсунзода, ноҳияҳои Варзобу Ҳисор ва шаҳрҳои Қурғонтеппа, Хуҷанд ва Исфара доир мегарданд. Ансамбли мазкур дар барномаҳои ҳунарии худ бештар суруду оҳангҳои қадимии Мавригии халқи тоҷикро тараннум мекунад.                   Бояд қайд кард, ки барнома ва сурудҳои он асрҳои 19 ва 20-ро дар бар гирифта, бо зарби доира аз ҷониби гурўҳи ҳофизону рақоссаҳо иҷро карда мешавад. Ҳамчунин, зикр гардид, ки Ансамбли фолклорию этнографии ҳунарии «Мавриги»-и шаҳри Бухоро бори аввал ба Ҷумҳурии Тоҷикистон сафари ҳунарӣ анҷом медиҳад.                   Дар барнома ҳама сурудҳо ба забони тоҷикӣ садо дода, ҳамзамон дар рафти консерт дар шаҳри Душанбе китоби «Мавригӣ»-и ба нота даровардаи доктори илмҳои санъатшиносӣ Низом Нурҷонов муаррифӣ мегардад. Зеро ансамбли номбурда бештари сурудҳоро аз ин китоб истифода кардааст.                   Дар ин бора ба мухбири АМИТ «Ховар» аз маркази матбуоти Вазорати фарҳанг хабар доданд.