М. АҲМАДИНАЖОД БА ИМКОНИЯТҲОИ СҲШ БАҲОИ БАЛАНД ДОД

                 Душанбе, 17 июн. (АМИТ «Ховар»).- Президенти Эрон Маҳмуд Аҳмадинажод чунин мешуморад, ки Созмони Ҳамкории Шанхай имкониятҳои худро истифода бурда, ояндаи наздик дар ҳалли проблемаҳои иқтисодии минтақа ва ҷаҳон нақши муҳим бозида метавонад.                 Вай қайд кард, ки дар қаламрави мамлакатҳои аъзои созмон захираҳои нафту газ хеле зиёданд. Ин мамлакатҳо дорои захираи фаровони қувваи корӣ буда, аз технологияи олӣ ва арзишҳои фарҳангӣ бархурдоранд. Онҳо метавонанд дар мавриди дуруст истифода бурдани имкониятҳояшон бисёр масъалаҳои сиёсию иқтисодӣ ва фарҳангиро мусбат ҳал намоянд.                  Мухбири АМИТ «Ховар» хабар медиҳад, ки президенти Эрон дар мулоқоти сарони давлатҳои аъзои СҲШ ҳамчун мушоҳид иштирок дорад.                  Ба қавли М. Аҳмадинажод, ҳамкории иқтисодии мамлакатҳои аъзои созмонро бо роҳи таъсиси бонки умумӣ вусъат додан зарур аст. Вай ҳамчунин пешниҳод кард, ки пули ягонаи мамлакатҳои аъзои созмон ҷорӣ карда шавад. Ман пешниҳод мекунам, ки барои ба даст овардани ин ҳадафҳо аз имкониятҳои палатаи тиҷоратию саноатии Теҳрон истифода бурда шавад, гуфт М. Аҳмадинажод.                   Вай изҳор намуд, ки давраи таназзули давлатҳои абарқудрат фаро расидааст. Ҳукмронии онҳоро дигар барқарор кардан мумкин нест. Ба ақидаи президенти Эрон, бӯҳронҳои гуногуни молиявию иқтисодӣ маҳз кори ҳамон давлатҳои абарқудрат мебошад. Онҳо мехоҳанд бо ин роҳ дороии мамлакатҳои дигарро ба даст оранд. Солҳои охир боварию эътимоди ҷомеаи ҷаҳон ба давлатҳои абарқудрат торафт коҳиш меёбад, гуфт М. Аҳмадинажод.