МАСОИЛИ ТУРИЗМИ КИШВАРҲОИ ИДМ-РО ДАР МИНСК БАРРАСӢ КАРДАНД

                  Душанбе, 15 июн. (АМИТ «Ховар», Ибодат Давлатова). — Дар шаҳри Мински Ҷумҳурии Белорусия ҷаласаи Шӯро оид ба туризми Иттиҳоди давлатҳои мустақил баргузор гардид.                  Тавре аз маркази матбуоти Кумитаи ҷавонон хабар доданд, дар кори ҷаласа аъзои Шӯро, раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Маликшо Неъматов иштирок намуд.                    Дар доираи ҷаласа Шӯро масъалаҳои вобаста ба рушди туризм дар кишварҳои ИДМ дар шароити бӯҳрони иқтисодиву молиявӣ, ҳамкорӣ дар омода намудани мутахассисони соҳа дар давлатҳои аъзо ва ҳамзамон амалӣ намудани қарори Шӯрои сарони ҳукуматҳои ИДМ оид ба иҷрои Нақшаи чорабиниҳои афзалиятнок дар соҳаи ҳамкориҳои гуманитарии кишварҳои ИДМ барои солҳои 2009-2010 баррасӣ шуданд.                    Инчунин, дар ҷаласа масъалаи интихоби раиси Шӯро баррасӣ гардид. Аз ҷониби иштирокчиён якдилона роҳбари Агентии федералӣ оид ба туризми Федератсияи Россия Ярочкин Анатолий Иванович Раиси Шӯро оид ба туризми Иттиҳоди давлатҳои мустақил интихоб гардид.                   Ба назардошти вазъи бӯҳрони иқтисодиву молиявӣ дар ҷаҳони муосир ҷонибҳо ба хулоса омаданд, ки бо истифода аз имкониятҳои мавҷуда ҳамкориҳои мутақобилан судманд ривоҷ дода шаванд. Аз ҷумла, зикр гардид, ки сайрхатҳо ва ҳамкориҳое, ки дар самти туризм дар кишварҳои аъзо мавҷуд буданд, аз ин нав эҳё карда шаванд.                   Ҷаласаи навбатии Шӯро оид ба туризми Иттиҳоди давлатҳои мустақил моҳи октябри соли ҷорӣ дар арафаи Ассамблеяи Генералии Ташкилоти Умумиҷаҳонии Туристӣ дар шаҳри Остона баргузор мегардад.