ТАШРИФИ КАРДИОЛОГИ ИТОЛИЁВӢ БА ДУШАНБЕ

                 Душанбе, 17 июн. (АМИТ «Ховар», Ибодат Давлатова). — Дар доираи лоиҳаи минтақавии Оҷонсии байналмиллалӣ оид ба энергияи атомӣ (МАГАТЭ) директори озмоишгоҳи клиникаи донишгоҳи шаҳри Удинеи Италия, кардиолог Гулиелмо Бернарди ба ҷумҳурии мо ташриф овард.                  Тавре аз маркази матбуоти Вазорати тандурустии Ҷумҳурии Тоҷикистон хабар доданд, ҳадафи асосии ин ташриф расонидани кӯмаки амалӣ оид ба беҳгардонии муҳофизати беморон ва кормандони тиббӣ аз таъсири нурҳои ионӣ мебошад.                  Ҳамчунин ҷаноби Бернарди барои мутахассисони соҳаи рентгенологияи тоҷик якчанд маърӯзаҳо хоҳад хонд. Масъалаҳои мубрами бехатарии радиатсионӣ ба монанди: таъсири нурҳои ионӣ ба организми инсон, нургирии кормандони тиббӣ ва воситаҳои муҳофизатӣ, муқаррароти меъёрҳои нургирии табобатгирандагон ва ғайра муҳокима карда мешаванд.                  Илова бар ин, аз ҷониби мутахассисони соҳаи ренгенология ва радиатсияи Тоҷикистон дар мавзӯъҳои «Санадҳои қонунгузории Ҷумҳурии Тоҷикистон дар соҳаи муҳофизати радиатсионӣ», «Муҳофизати радиатсионии табобатгирандагон», «Вазъи муҳофизати радиатсионӣ ҳангоми амалиётҳои интервентсионӣ» намоишҳо пешниҳод карда мешаванд.                  Бояд қайд намуд, ки сафари кории Гулиелмо Бернарди то 20 июни соли ҷорӣ давом хоҳад кард.