ҚУРМОНБЕК БОҚИЕВ БОЗ ПРЕЗИДЕНТИ ҚИРҒИЗИСТОН ИНТИХОБ ШУД

                   Бишкек, 24 июл. (АМИТ «Ховар», Лента.ру).-Тибқи хабарҳои аз Бишкек расида, дар ин ҷо интихоботи президенти Қирғизистон баргузор гардид. Аз рӯи натиҷаҳои интихобот, Қурмонбек Боқиев 67% овози интизобкунандагонро ба даст оварда, боз президенти ҷумҳурӣ интихоб гардид. Ҳарифони Қ. Боқиев Алмосбек Отамбоев 12,7% ва Темур Сориев 6% овози интихобкунандагонро ба даст оварданд. Шумораи ночизи интихобкунандагон номзадии Жанишбек Назаралиев, Нурлан Мотуев ва Тухтаоим Умедалиеваро дастгирӣ намуданд.                   Қитъаҳои овоздиҳӣ дар Қирғизистон расо соати 20 баста шуданд. Аз рӯи натиҷаҳои пешакӣ, дар интихобот бештар аз 70% интихобкунандагон ширкат варзиданд.                    Тарафдорони номзадҳои мансаби президент А. Отамбоев ва Ж. Назаралиев баъди анҷоми овоздиҳӣ изҳор намуданд, ки намояндагони мақомоти маҳаллӣ барои таъмини ғалабаи Қ. Боқиев ба хилофкориҳои сершумор роҳ доданд. Онҳо натиҷаҳои интихоботро ғайриқонунӣ ҳисобида изҳор намуданд, ки аз иштироки минбаъдаашон дар интихобот даст мекашанд.  Вале Комиссияи марказии интихобот онҳоро огоҳ намуд, ки дар марҳалаи анҷоми овоздиҳӣ ҳуқуқи бекор кардани номзадиашонро надоранд. Тарафдорони Отомбоев изҳор намуданд, ки 23 июл дар маркази шаҳри Бишкек маъракаи доманадори эътирозӣ ташкил хоҳанд кард, вале мақомоти иҷроияи ҳокимияти давлатии шаҳр изҳор намуд, ки дар рӯзи интихобот гузаронидани ҳар гуна чорабиниҳои марбут ба овоздиҳӣ манъ карда мешавад.