ҶАМЪБАСТИ НАТИҶАҲОИ НИМСОЛА

                     Душанбе, 11 июл. (АМИТ «Ховар», Пайрав Назаров).- Дирӯз дар толори Маркази ҷумҳуриявии матбуот нишасти матбуотии роҳбарияти Кумитаи кор бо ҷавонон, варзиш ва сайёҳии назди Ҳукумати ҷумҳурӣ баргузор гардид. Дар нишасти матбуотӣ роҷеъ ба фаъолияти кумита дар давоми 6 моҳи гузаштаи соли равон дар масъалаи ташкили мусобиқаҳои варзишӣ ва дастовардҳои варзишгарони мамлакат маърӯза карда шуд. Аз ҷумла зикр шуд, ки дар давоми 6 моҳи гузашта дар миқёси мамлакат бештар аз 37 мусобиқаи калони варзишӣ баргузор гардид ва дар онҳо қариб 5 ҳазор варзишгар иштирок дошт.                   Дар ин давра варзишгарони тоҷик дар 40 мусобиқаи варзишии байналхалқӣ ва қитъаи Осиё ширкат варзиданд. Онҳо натиҷаҳои назаррас ба даст оварда соҳиби 171 медал гардиданд. Қайд карда шуд, ки имсол дар мамлакат Рӯзи ҷавонони Тоҷикистон ва Марафони ваҳдат дар сатҳи олӣ ва муташаккилона баргузор гадиданд.