ҶОИ ЗИСТИ 50 ОИЛА ДИГАР КАРДА МЕШАВАД

                      Душанбе, 7 июл. (АМИТ «Ховар», Лаззат Диловарзод).- Бино ба иттилои Раёсати ҳифзи иҷтимоӣ, шуғл ва муҳоҷирати аҳолии шаҳри Кӯлоб, шумораи муҳоҷирони ихтиёрии шаҳру ноҳияи Кӯлоб соли ҷорӣ 50 оиларо дар бар мегирад.                      Ба иттилои ҳамин манбаъ, раёсати мазкур, дар ҳамкорӣ бо мақомоти иҷроияи маҳаллии ҳокимияти давлатии шаҳру ноҳияи Кӯлоб дар 4 ҷамоати ноҳияи Кӯлоб барои оилаҳои дар ҳақиқат ба хонаю ҷой мӯҳтоҷ корҳои фаҳмондадиҳӣ бурда шуд.                       Алҳол аризаи 10 оилаи муҳоҷирони ихтиёрӣ қабул карда шудааст, ки рӯзҳои наздик ба ноҳияи Шаҳритус интиқол дода мешаванд.                       Бояд тазаккур дод, ки муаллимон ва духтурони муҳоҷиратшуда, бо хонаю ҷой таъмин гардонида мешаванд. Барои дигар оилаҳо бошад, замин барои сохтмони манзил ҷудо карда мешавад.                        Дар 6 соли охир аз шаҳру ноҳияи Кӯлоб беш аз 230 оила ба ноҳияҳои Қумсангир, Н. Хисрав ва шаҳри Турсунзода кӯчонида шудааст.