БАСТАНИ БОЗОРИ ЧЕРКИЗ САБАБИ АФЗОИШИ ҶИНОЯТ НАГАШТ

                   Маскав, 24 июл. (АМИТ «Ховар», Правда. Ру).-Муовини сардори милитсияи таъминоти амнияти ҷамъиятии Раёсати корҳои дохилии шаҳри Маскав Григорий Краснов зимни сӯҳбат бо хабарнигорон изҳор намуд, ки бастани бозори Черкиз сабаби афзоиши ҷинояткорӣ дар шаҳри Маскав нагардид. Ҳол он ки мақомоти муҳофизи тартибот ва аҳли ҷамъият вобаста ба баста шудани бозори мазкур изҳори ташвиши ҷиддӣ менамуданд.                   Ба қавли Г. Краснов вазъи бозор ва тамоми минтақа таҳти назорати мақомоти муҳофизи қонуну тартибот қарор дорад. Айни ҳол вазъияти шаҳр мӯътадил мебошад. Барои таъмини тартиботи ҷамъиятӣ қувваҳои иловагӣ ҷудо карда шуданд.                   Краснов зикр кард, ки теъдоди содир гардидани ҷиноят дар Маскав аз аввали сол дар байни шаҳрвандони хориҷӣ 16% афзудааст. Одамон дар ҷустуҷӯи кор муддати дароз саргардон шуда, бисёр вақт ба доираи фаъолияти ҷинояткорон ҷалб мегарданд, гуфт намояндаи РКД Маскав.                  Аз рӯи маълумоти мавҷуда вақтҳои охир дар Маскав ҳодисаҳои дуздӣ, талаю тороҷ ва ғайриқонунӣ нигоҳ доштани аслиҳа бештар мушоҳида мешавад. Г. Краснов дар хотима изҳор намуд, ки мардикорони Ўзбекистон, Тоҷикистон, Қирғизистон, Арманистон ва Озарбойҷон дар пойтахти мамлакат бештар ҷиноят содир менамоянд.