КӮЧОНИДАНИ АҲОЛӢ АЗ НОҲИЯҲОИ КАМЗАМИН

                      Душанбе, 1 июл. (АМИТ «Ховар», Лаззат Диловарзод).- Тибқи қарори Ҳукумати Ҷумҳурии Тоҷикистон аз 2-юми майи соли 2008 «Дар бораи нақшаи муҳоҷирати дохилӣ (ихтиёрӣ)-и аҳолии қобили меҳнат аз ноҳияҳои камзамини кӯҳистон ва сераҳолӣ ба водиҳои дорои заминҳои бекорхобидаи ҷумҳурӣ дар солҳои 2008-2009», соли ҷорӣ бояд 710 оила ихтиёрӣ кӯчонида шаванд. Аз он ҷумла дар вилояти Хатлон 185 оила, вилояти Суғд — 308 ва ноҳияҳои тобеи ҷумҳурӣ 217 оила ба минтақаи Қӯрғонтеппа ва ноҳияи Турсунзода кӯчонда мешаванд.                     Вазорати молия бо мақсади муҳоҷирати дохилӣ дар соли 2009 1 млн. 724 ҳазору 54 сомонӣ ҷудо намуд. Аз ҳисоби маблағҳои ҷудошуда соли 2009 ба 605 оилаи муҳоҷирони дохилӣ (ихтиёрӣ), ки дар соли 2008-2009 маблағгузорӣ карда нашудаанд, маблағи қарзи имтиёзнок ба миқдори 907 ҳазору 500 сомонӣ пардохт карда шуд.