МАБЛАҒИ ЗАХИРАИ ТИЛЛОВУ АСЪОРИ ЧИН МЕАФЗОЯД

             Пекин, 15 июл. (АМИТ «Ховар» — РБК). — Бонки марказии мардумии Чин хабар дод, ки маблағи захираи тиллову асъори мамлакат имсол дар таърихи ҷумҳурӣ бори аввал аз ду триллион доллари ИМА гузашт. Маблағи захираи он дар семоҳаи дуюми соли равон 177,9 миллиард доллар зиёд гардида, ба 2,13 триллион доллар расид. Дар семоҳаи аввали соли равон захираи Чин ҳамагӣ 7,7 миллиард доллар зиёд гардид. Ин натиҷаи аз мамлакат баровардани маблағи зиёди пул мебошад.             Вале дар давоми моҳҳои минбаъда ҳаҷми захираи тиллову асъор босуръат афзуд. Зеро Чин маблағи хеле зиёди асъори хориҷиро харида, инчунин барои баланд бардоштани қурби пули миллӣ тадбирҳои самарабахш андешид.              Ба қавли коршиносони соҳаи молия, Ҷумҳурии Мардумии Чин аз ҷиҳати захираи тиллову асъор дар ҷаҳон ҷои аввалро ишғол менамояд. Вобаста ба бӯҳрони ҷаҳонии молиявию иқтисодӣ Чин торафт бештар доллари амрикоиро харида, захира менамояд. Дар мамлакат истифодаи пулҳои хориҷӣ, аз ҷумла, доллари ИМА дар хариду фурӯши мол қатъ карда шудааст. Ин мақомоти Амрикоро ба ташвиш меорад.              Вазири молияи ИМА Тимоти Гайтнер изҳор намуд, ки вазифаи асосии имрӯза барқарор сохтани боварии мамлакатҳои ҷаҳон ба иқтисодиёти мамлакат мебошад. Барои ин сиёсати мустаҳкам намудани мавқеи пули миллӣ пеш гирифта шудааст, гуфт вай.                                                           Тарҷумон — Қудратов А.