НАРХИ ҚУВВАИ БАРҚ БАЛАНД МЕШАВАД

                Душанбе, 27 июл. (АМИТ «Ховар», Фарангис Раҳимова). — Муовини аввали вазири рушди иқтисод ва савдои ҷумҳурӣ Амонулло Ашӯр имрӯз зимни нишасти матбуотӣ ба хабарнигорон гуфт, ки ширкати саҳомии «Барқи тоҷик» ба Вазорати рушди иқтисод ва саноати ҷумҳурӣ пешниҳод кардааст, ки нархи фурӯши қувваи барқ барои ҳамаи истифодабарандагони он 25 фоиз баланд карда шавад.                Қайд карда шуд, ки мутахассисони вазорат ин пешниҳодро омӯхта, дар ин хусус лоиҳаи қарори Ҳукумати Ҷумҳурии Тоҷикистонро тайёр намуданд. Мувофиқи он нархи қувваи барқ дар саросари ҷумҳурӣ 25 фоиз баланд бардошта мешавад, гуфт А.Ашӯр.                Вай афзуд, ки баланд шудани нархи қувваи барқ ба дастури созмонҳои байналхалқии молиявӣ, аз ҷумла, Бонки ҷаҳонӣ ва Хазинаи байналхалқии асъор вобаста мебошад. Онҳо ба Ҳукумати Тоҷикистон тавсия доданд, ки нархи як киловатт соат қувваи барқро то соли 2010 тадриҷан ба 2,5 цент расонад. Яъне тибқи дастури ин созмонҳои байналхалқӣ нархи қувваи барқ дар Тоҷикистон бояд ба нархи қувваи барқ дар мамлакатҳори дигари Осиёи Марказӣ ва ИДМ баробар карда шавад.               Дар маҷлиси Ҳукумати Ҷумҳурии Тоҷикистон, ки имрӯз, 27 июл таҳти раёсати Президенти ҷумҳурӣ, Раиси Ҳукумати мамлакат Эмомалӣ Раҳмон баргузор гардид, дар бораи баланд бардоштани нархи қувваи барқ аз 1 августи соли 2009 қарор қабул карда шуд.                                                                                                          Тарҷумон — Қудратов А.