БЕШ АЗ 1 МИЛЛИОН НАФАР ТАЛАБА ПАСИ МИЗИ МАКТАБӢ МЕШИНАНД

                  Душанбе, 31 август.(АМИТ «Ховар», Марзия Саидова).-Беш аз 1 миллион нафар талаба пагоҳ 1 сентябр дар Рӯзи дониш бо садо додани Занги аввал дар паси мизи мактабӣ менишинанд.                   Тибқи иттилои сардори маркази матбуоти Вазорати маорифи ҷумҳурӣ Ноилшо Нуралиев дар соли таҳсили 2009-2010 дар саросари ҷумҳурӣ 18 мактаби нав ба истифода супорида шуд, ки аз он 8 тоаш дар ноҳияҳои тобеи марказ, се мактаб дар вилояти Хатлон, дар Суғд 4 мактаб ва дар Вилояти Мухтори Кӯҳистони Бадахшон 3 мактаб сохта шудааст.  Инчунин, дар ҷумҳурӣ 86 адад биноҳои иловагӣ дар назди мактабҳо бунёд карда шудааст. 30 мактаб бошад аз таъмири асосӣ бароварда шуд. Бо вуҷуди сохтмони мактабҳои нав дар ҷумҳурӣ 20 ҳазор ҷойи нишаст намерасад.                    То охири соли 2009 дар ҷумҳурӣ сохтмони 16 мактаби нав, 53 бинои иловагӣ дар назди мактабҳо ва таъмири асосии 6 мактаб ба анҷом расонида мешавад, ки аз рушди соҳаи маориф дар кишвар шаҳодат медиҳад.