ДУ ҚАЛЛОБ АЗ НОҲИЯИ ШАҲРИНАВ

                   Душанбе, 24 август. (АМИТ «Ховар», Жасмин Назарова). — Тавре ба АМИТ «Ховар» аз дафтари матбуоти Вазорати корҳои дохилии ҶТ иттилоъ доданд, дар натиҷаи гузарондани чораҳои фаврӣ-ҷустуҷӯӣ аз ҷониби кормандони шӯъбаи корҳои дохилии н. Сино — 2-и шаҳри Душанбе, муайян карда шуд, ки моҳи сентябри соли 2008 истиқоматкунандаи ноҳияи Шаҳринав, Фирӯза Ниёзова ба боварии шаҳрванд, истиқоматкунандаи кӯчаи Туниси шаҳри Душанбе Сӯҳроб Идиеви 34 сола даромада, бо роҳи фиреб аз ӯ 20 ҳазор евро ба даст меорад. С. Идиев ба шӯъбаи корҳои дохилии н. Сино — 2-и шаҳри Душанбе барои барнагардонидани маблағи гирифташуда бо ариза муроҷиат мекунад. Нисбати қазияи мазкур парвандаи ҷиноӣ боз карда шудааст.                    Ҳамчунин, аз ҷониби кормандони шӯъбаи корҳои дохилии ноҳияи мазкур, нисбати истиқоматкунандаи дигари ноҳияи Шаҳринав Хурсаной Саидова, соли таваллудаш 1943, бекор, ки бо роҳи қаллобӣ аз шаҳрванд Ҳалима Шокирова, истиқоматкунанди кӯчаи Н. Қарабоеви шаҳри Душанбе, соли таваллудаш 1961, 3 200 доллари амрикоӣ ба даст овардааст, парвандаи ҷиноӣ боз карда шудааст.