МУКОФОТ БАРОИ МАЪЛУМОТ ДАР БОРАИ ҚОТИЛОН

                   Грозный, 18 август. (АМИТ «Ховар» — Лента.ру). — Президенти Ҷумҳурии Чеченистон Рамазон Қодиров ваъда кард, ки барои додани маълумот дар бораи қотилони панҷ сокини русзабони деҳаи Первомайская мукофот дода хоҳад шуд. Аз рӯи хабарҳои расида, ҷасадҳои панҷ сокини деҳаи мазкур 17 август дар хонаашон ёфт шуд.                    Р.Қодиров изҳор намуд, ки дар ин бора ба Фонди минтақавии ба номи А.Қодиров пешниҳод ба миён хоҳад гузошт. Қайд карда шуд, ки ин рафтори қотилон на ба қонунҳои Чеченистон, на ба қонунҳои Русия ва на ба қонунҳои ислом мувофиқат намекунад.  Президенти Чеченистон зикр кард, ки агар фарзандони хурдсоли шахсони ҳалокшуда хеши табори наздик надошта бошанд, вай тайёр аст, онҳоро ба оилаи худ гирифта, ҳамчун фарзандони худаш тарбия кунад. Р.Қодиров ба муовини раиси Фонди А.Қодиров, раиси шаҳри Грозный Муслим Хучиев супориш дод, ки маросими дафни шахсони ҳалокшударо аз ҳисоби давлат гузаронад.                    Тибқи хабарҳои аз Грозный расида, ҳамсояҳои оилаи Калиниченкоҳо ҷасадҳои панҷ аъзои оилаи мазкурро баъди чошти 17 август дар ҷои хобашон пайдо карданд.  Шахсони номаълум Вера Калиниченко, Алексей Калиниченко, Антонина Калиниченко, Дмитрий Крючков ва Мария Свинсоваро дар ҷои хобашон паррондаанд. Инчунин аз ҳамон хона як писарча ва як духтарчаи якуним ва сесола ёфт шуданд, ки дар натиҷаи ҳуҷуми қотилон осеб надидаанд.                    Сардори Раёсати хадамоти Федералии амнияти Чеченистон Александр Сулимов зикр намуд, ки ин амали ҷинояткоронаро аъзои яке аз гурӯҳҳои силоҳбадастон содир намудаанд. Ҳадафи онҳо ноором ва муташанниҷ сохтани вазъияти Чеченистон ва авҷ гирондани хусумати байни миллатҳо мебошад. Қайд карда шуд, ки мутахассисони хадамоти федералии амният ба тафтиши ин воқеа шурӯъ карданд.