ҚУВВАОЗМОИҲОИ НИМАНИҲОӢ АНҶОМ ЁФТАНД

                 Душанбе, 26 сентябр. (АМИТ «Ховар», Пайрав Назаров). — Дирӯз дар варзишгоҳи «Металлург» — и шаҳри Турсунзода ду қувваозмоии ниманиҳоии дастаҳои футболи Осиё барои ба даст овардани Ҷоми раиси Конфедератсияи футболи Осиё анҷом ёфтанд.                Дар яке аз ин қувваозмоиҳо дастаи футболи «Регар – Тадаз» — и Тоҷикистон ва дастаи футболи «ВАПДА» -и Покистон ширкат варзиданд. Дар ин қувваозмоии нобаробар дастаи футболи Тоҷикистон бо ҳисоби 4:3 ғолиб омад. Қисми аввали бозӣ ба фоидаи меҳмонон анҷом ёфт. Дар даври дуюми он ҳисоби бозӣ баробар шуд. Даври аввали иловагӣ низ бо ҳисоби баробари 3:3 анҷом ёфт. Ба футболбозони тоҷик муяссар шуд, ки дар даври дуюми иловагӣ ба дарвозаи ҳарифонашон як тӯб зада, ғалаба ба даст оранд. Ҳамин тариқ ин қувваозмоӣ бо ҳисоби 4:3 ба фоидаи футболбозони тоҷик анҷом ёфт. Акнун дастаи футболи «Регар – Тадаз» 27 сентябр дар қувваозмоии хотимавӣ бо дастаи футболи «Дурдой – Динамо» — и Қирғизистон вомехӯрад. Футболбозони қирғиз дастаи футболи «Ашқобод» — ро бо ҳисоби 2:1 мағлуб карданд.                 Агар дастаи «Регар — Тадаз» дар ин мусобиқа ғалаба ба даст орад, Ҷоми раиси Конфедератсияи футболи Осиё ба таври доимӣ дар Тоҷикистон мемонад. Зеро футболбозони тоҷик пеш аз ин ду маротиба ғалаба карда буданд.