БАРҚИЯИ ШОДБОШИ ЭМОМАЛӢ РАҲМОН БА УНВОНИ ИСЛОМ КАРИМОВ

                Президенти Ҷумҳурии Тоҷикистон Эмомалӣ Раҳмон дирӯз ба унвони Президенти Ҷумҳурии Ӯзбекистон Ислом Каримов барқияи шодбош фиристод. Дар он аз ҷумла, гуфта мешавад:                 «Ислом Абдуғаниевичи мӯҳтарам, аз фурсати мусоид истифода бурда, Шумо ва дар симои Шумо тамоми мардуми Ӯзбекистонро ба муносибати солгарди навбатии иди миллии мамлакататон – эълони истиқлолияти давлатии он самимона табрик менамоям.                 Мамлакатҳои моро муносибатҳои бисёрасраи дӯстона ва ҳусни ҳамҷаворӣ ба ҳамдигар мепайванданд. Мо дар марҳалаи ҳозира ҳамкориро дар соҳаҳои гуногун густариш бахшида, мисли пештара давом додани анъанаҳои неки гузаштаю имрӯзаро ҷонибдорӣ менамоем.                 Муносибатҳои мо аз бисёр ҷиҳат ба шарофати кӯшишҳои Шумо вақтҳои охир нерӯи тоза пайдо карданд. Ин ба истифодаи бештари имкониятҳои равнақу ривоҷи ҳамкории мамлакатҳоямон кӯмак мерасонад. Мо умедвори идомаи ҳамкории мутақобалаи самарабахши Тоҷикистону Ӯзбекистон ба манфиати халқҳои онҳо ва таъмини амнияту суботи минтақа мебошем. Мо барои ин тайёрем, ки аз тамоми имкониятҳои мавҷуда истифода барем.                Аз ин лаҳзаҳои фараҳбахш истифода бурда, ба Шумо, Ислом Абдуғаниевичи гиромӣ саломатӣ, барору комёбиҳои нав ва ба халқи бародари ӯзбек дар оилаи калони миллатҳои Осиёи Марказӣ сулҳу осоиш, шукуфоӣ ва рӯзгори фараҳмандона орзу менамоям».