ДАВРАИ БӮҲРОНИ МОЛИЯВӢ БА ОХИР МЕРАСАД

                Вашингтон, 22 сентябр. (АМИТ «Ховар», Лента.ру). – Олими машҳури иқтисодшинос, барандаи ҷоизаи Нобел Пол Кругман 21 сентябр изҳор намуд, ки давраи бӯҳрони шадиди ҷаҳонии молиявӣ ба охир расидааст ва иқтисодиёти ҷаҳон тадриҷан ва бо душворӣ бошад ҳам, барқарор карда мешавад. Ба қавли ӯ давраи барқароршавии иқтисодиёти ҷаҳон камаш ду сол ва аз он бештар давом хоҳад кард.                  Олим изҳори шубҳа намуд, ки Ҷумҳурии Мардумии Чин дар оянда мамлакати бойтарини ҷаҳон хоҳад гашт. Ба қавли олим иқтисодиёти мамлакатро танҳо аз ҳисоби содироти мол ғанӣ гардондан мумкин нест. Кругман зикр намуд, ки бӯҳрони молиявӣ дар ИМА охири моҳҳои июл ва август ба охир расид.                  Дар ин бора, яке аз одамони бойтарини ҷаҳон ва самоягузори машҳури амрикоӣ Уоррен Баффет низ сухан ронда буд.                  Моҳи сентябр Комиссияи Аврупо низ дар бораи анҷом ёфтани давраи бӯҳрон дар Аврупо ва тадриҷан барқарор гардидани иқтисодиёти мамлакатҳои минтақа изҳорот дарҷ намуда буд.