ФУТБОЛБОЗОНИ ҚИРҒИЗ БАРОИ БУРДАНИ ҶОМИ КФА БА ДУШАНБЕ ОМАДАНД

                Душанбе, 23 сентябр. (АМИТ «Ховар», Пайрав Назаров). – Футболбозони дастаи «Дурдой — Динамо» — и Қирғизистон 22 сентябр барои иштирок дар қувваозмоии хотимавии мусобиқаи футбол барои ба даст овардани Ҷоми раиси Конфедератсияи футболи Осиё ба Тоҷикистон омаданд.                 Мухбири АМИТ «Ховар» хабар медиҳад, ки дар қувваозмоии хотимавии мусобиқа чор дастаи дар мусобиҳои қаблӣ ғолибомада, иштирок хоҳанд кард. Онҳо дастаҳои футболи «Дурдой – Динамо» — и Қирғизистон, «Ашқобод» — и Туркманистон, «Вапда» — и Покистон ва «Регар – Тадаз» -и Тоҷикистон мебошанд.                Дастаи «Дурдой – Динамо» 25 сентябр бо дастаи «Ашқобод» қувва меозмояд. Ҳамон рӯз қувваозмоии дастаи «Регар – Тадаз» бо дастаи «Вапда» баргузор хоҳад гашт. Қувваозмоии хотимавии онҳо 27 сентябр гузаронида мешавад.