КОНФРОНСИ БАЙНАЛХАЛҚӢ ДАР ХУҶАНД

                   Душанбе, 28 сентябр. (АМИТ «Ховар», Санавбар Мақсудова). – Рӯзҳои 25 то 26 сентябри соли равон дар Донишгоҳи давлатии ҳуқуқ, тиҷорат ва сиёсати шаҳри Хуҷанд дар мавзӯи «Ҳалли самарабахши проблемаҳои муҳоҷирати коргарон дар Осиёи Марказӣ ва Русия» симпозиуми байналхалқӣ баргузор гардид.                    Симпозиум бо ташаббуси Донишгоҳи давлатии ҳуқуқ, тиҷорат ва сиёсати шаҳри Хуҷанд, Пажӯҳишгоҳи тадқиқоти иҷтимоию сиёсии Академияи илмҳои Русия ва Маркази демографии иҷтимоӣ ва ҷомеашиносии иқтисодии ин мамлакат гузаронида шуд.                     Мухбири АМИТ «Ховар» хабар медиҳад, ки симпозиум дар шаҳри Маскав дар толори Академияи илмҳои Федератсияи Русия оғоз ёфт ва баъдан дар Хуҷанд давом дода шуд.                   Дар симпозиум роҳбарони муассисаҳои илмӣ ва донишмадони Тоҷикистон, Русия, Қирғизистон ва Ҷопон сухан карданд.     Аз ҷумла, директори Пажӯҳишгоҳи тадқиқоти иҷтимоию сиёсии Академияи илмҳои Русия Геннадий Осипов, профессори Маркази тадқиқоти Шарқи Дури донишгоҳи Ҷопон Тояма Хорие Норио, номзади илми иқтисод, мудири кафедраи иқтисод ва менеҷменти донишгоҳи давлатии шаҳри Ӯши Қирғизистон Уран Эргашбоев ва доктори илми таърих, ректори Донишгоҳи давлатии ҳуқуқу тиҷорат ва сиёсати шаҳри Хуҷанд Осим Каримов дар мавзӯъҳои гуногуни марбут ба муҳоҷирати коргарон ва таъсири он ба иқтисодиёти кишварҳои Осиёи Марказӣ ва Русия маърӯзаҳо карданд.               Дар ҷараёни симпозиум дар мавзӯи «Муҳоҷирати коргарон ва равобити иқтисодии Осиёи Марказӣ ва Русия» конфронси интернетӣ ташкил карда шуд.