КОНСЕРТИ КАЛОНИ ИДОНА

               Душанбе, 8 сентябр. (АМИТ «Ховар», Лутфия Эшонқулова). – 8 сентябр дар Кохи Борбад бахшида ба ҷашни 18 — солагии истиқлолияти давлатии Ҷумҳурии Тоҷикистон ҷамъомади бошукӯҳ ва консерти калони идона баргузор гардид. Дар он Президенти Тоҷикистон Эмомалӣ Раҳмон ва Президенти Ҳиндустон Пратибха Девисингх Патил ҳузур доштанд.               Сардори давлат Эмомалӣ Раҳмон зимни суханрониаш ҳамаи ҷамъомадагон, сокинони мамлакат ва тоҷикзабонону форсизабонони ҷаҳонро ба муносибати ид самимона табрик намуд. Вай зикр кард, ки истиқлолияти давлатии мамлакат дастоварди бузургтарин ва бебаҳотарини тоҷикон мебошад.              Президенти Ҳиндустон Пратибха Девисингх Патил низ ҳозиронро ба муносибати ҷашн табрик намуд. Вай ба халқи тоҷик барору комёбиҳои нав орзу намуда, изҳор кард, ки мардуми Ҳиндустон низ ба шодию фараҳмандии халқи тоҷик шарик мебошад.              Дар консерти идона гурӯҳҳои эҷодии «Фалак», «Шашмақом», «Дарё», ҳунармандони Филармонияи давлатии ба номи А.Ҷӯраев, гурӯҳҳои раққосони «Гулрез», «Рухшона», «Лола» ва овозхонони маъруфи эстрада Дилором Қурбонова, Бахтиёр Иброҳимов, Шӯҳрат Сайнаков ва Жанна Шаинян иштирок намуданд.             Барномаи консертӣ суруду оҳангҳои адибон ва оҳангсозони муосир ва классикиро дар бар мегирифт. Дар ҷараёни он талабагони мактаби мусиқии ба номи М.Атоев ва гурӯҳи эҷодии гимнастҳои Вазорати мудофиаи ҷумҳурӣ барномаи махсус намоиш доданд.