МУҲОКИМАИ МАСЪАЛАҲОИ ПЕШГИРИИ ФАЪОЛИЯТИ ҚОЧОҚЧИЁН

                 Душанбе, 24 сентябр. (АМИТ «Ховар», Наталя Михайлова). — Рӯзҳои 23 – 24 сентябр дар Душанбе маҷлиси 8 – уми роҳбарони бунгоҳҳои миллии алоқаи муассисаҳои гумруки мамлакатҳои аъзои Бунгоҳи минтақавии алоқаи Созмони ҷаҳонии гумрук «RILO – Маскав» баргузор гардид. Дар он роҳбарони бунгоҳҳои миллии алоқаи муассисаҳои гумруки Озарбойҷон, Арманистон, Қазоқистон, Қирғизистон, Русия, Тоҷикистон, Ӯзбекистон, намояндаи Раёсати марказии гумруки Украина, Созмони ҷаҳонии гумрук, мамлакатҳои Аврупо, Маркази миллии озони Тоҷикистон, Маркази зиддитеррористии ИДМ, Дафтари ҳамоҳанг сохтани мубориза ба муқобили ҷиноятҳои муташаккилона ва навъҳои дигари ҷинояти хавфнок дар ИДМ ширкат варзиданд.                  Маҷлисро директори Созмони ҷаҳонии гумруки «RILO – Маскав» кушод. Муовини сардори Хадамоти гумруки назди Ҳукумати Тоҷикистон Абдумӯъмин Муродов иштирокчиёни маҷлисро хайра мақдам гуфт. Дар маҷлис проблемаҳои ҷории ҳамкории бунгоҳҳои алоқаи миллии мамлакатҳо ва роҳҳои беҳтар сохтани мубодилаи маълумот дар доираи истифодаи шабакаи ҳифзи қонун муҳокима карда, баъзе тадбирҳои пешгирикунандаи муборизаро ба муқобили қочоқи маводи нашъадор, тамокую сигарет, аслиҳа, лавозимоти ҷангӣ, маҳсулоти пастсифат ва қочоқи пулро мавриди баррасӣ қарор доданд.                   Намояндагони созмонҳои хориҷӣ ба фаъолияти Хадамоти гумруки назди Ҳукумати Ҷумҳурии Тоҷикистон дар мубориза ба муқобили хариду фурӯши гайриқонунии маводи нашъадор баҳои баланд доданд.