МУШКИЛОТИ ТИББИ ХАЛҚӢ

                Душанбе, 25 сентября. (АМИТ «Ховар», Ибодат Давлатова). – Онҳое, ки гиёҳшиносанд ва тахассуси миёнаи тиббӣ доранд барои гирифтани иҷозатномаи фаъолият бояд курсҳои омӯзишии 6 моҳа ва мутахассисони дорои тахассуси олӣ курсҳои 3 моҳа гузаранд,- қайд гардид 24 сентябри соли ҷорӣ дар ҷамъомади илмию машваратӣ таҳти мавзуи «Тибби халқӣ ва масъалаҳои ҳалталаби он».                  Инчунин, қайд карда шуд, ки иҷозатнома ин иҷозати махсус барои амалӣ намудани фаъолияти муайян бо риояи ҳатмии шарту талаботҳо мебошад, ки ин барои иҷозати фаъолияти тиббӣ ҳатмӣ аст. Масъалаи иҷозатномадиҳӣ дар зери диқати Ҳукумат қарор дошта, манфиатҳои соҳибкоронро ҳифз менамояд.                   Дар ҷамъомад олимону мутахассисони тибби халқӣ ва табибони халқии ҷумҳурӣ, намояндагони вазорату идораҳо ҷамъ омада буданд, ки дар он оид ба дастовардҳо ва масъалаҳои ҳалталаби тибби халқӣ, ба расмият даровардан ва гирифтани иҷозатномаҳо барои табибони халқӣ, қабули аъзоёни нав ба узвияти Ассотсиатсияи касбии тибби анъанавӣ ва таҳияи маълумотнома оид ба тибби халқӣ, тибби хусусӣ ва дорухонаҳои хусусиро муҳокима намуданд.