«ТОҶИКСТАНДАРТ»: ЛАМПАҲОИ ЛЮМИНЕСТСЕНТӢ БЕЗАРАРАНД

                Душанбе, 14 сентябр. (АМИТ «Ховар», Лаззат Диловарзод).- Ба гуфти сардори Раёсати Агентии «Тоҷикстандарт» Ҷӯрабек Раҳимов лампаҳои люминестсентӣ аз лампаҳои рӯшноидиҳандаи диодӣ на танҳо бо шаклу намуд ва дараҷаи ҳарорат, балки бо доштани миқдори бӯғи симоби таркибашон низ фарқ мекунанд. Ба гуфти Ҷ. Раҳимов агар дар лампаҳои люминестсентӣ 30 – 40 милиграмм бӯғи симоб мавҷуд бошад, лампаҳои нави каммасраф ҳамагӣ 2-3 милиграмм пайвастагии симоб доранд. Ба тарзи дигар, симоби дар таркиби ҳароратсанҷ буда аз лампаҳои нав 1000 маротиба зиёд аст. Лампаҳои люминестсентӣ ҳамон вақт метавонанд зарарнок гарданд, ки баъди корношоямӣ ба партов табдил ёбанд. Дар асл онҳо хеле мустаҳкаманд ва дуру дароз хизмат карда метавонанд. Мӯҳлати кафолатноки давраи истифодаи онҳо 5 сол ва мӯҳлати хизматашон 10 сол мебошад.                Дар оянда ҳангоми ба таври оммавӣ ба истифодаи лампаҳои каммасраф гузаштан масъалаи истифодаи партовҳои онҳо низ ҳал хоҳад шуд.