ҶАЛАСАИ НАВБАТӢ ДАР ПЕКИН

                Душанбе, 13 октябр. (АМИТ «Ховар» — gazeta. kz). – Пагоҳ 14 октябр дар пойтахти Ҷумҳурии Мардумии Чин ҷаласаи навбатии сарони давлатҳои Созмони ҳамкории Шанхай баргузор мешавад. Бо даъвати Раиси Шӯрои давлатии Ҷумҳурии Мардумии Чин Вэн Сзябао дар иҷлосия роҳбарон ва ё намояндагони Қазоқистон, Қирғизистон, Русия, Тоҷикистон, Ӯзбекистон ва давлатҳои нозири СҲШ иштирок мекунанд.                 Дар ҷамъбасти кори иҷлосия қабули як қатор ҳуҷҷатҳо, аз ҷумла оид ба буҷаи СҲШ барои соли 2010; Изҳороти якҷоя оид ба тақвият бахшидан ба ҳамкориҳои бисёрҷонибаи иқтисодӣ барои бартараф кардани оқибатҳои бӯҳрони ҷаҳонии молиявӣ ва рушди минбаъдаи иқтисодиёти давлатҳои СҲШ; оид ба мубориза бар зидди паҳн шудани бемориҳои гузаранда дар ҳудуди давлатҳои Созмон дар назар дошта шудааст.                 Дар ҳузури сарони давлатҳо, роҳбарони хадамоти гумрукии давлатҳои СҲШ дар бораи ҳамкорӣ оид ба омода кардани мутахассисон ва боло бурдани маҳорати касбии кормандони соҳаи гумрук Протоколи ҳамкорӣ ба имзо мерасонанд.                 Ёдовар мешавем, ки дар ҳайати СҲШ давлатҳои Русия, Чин, Қазоқистон, Қирғизистон, Тоҷикистон ва Ӯзбекистон шомил буда, мамлакатҳои Муғулистон, Ҳиндустон, Эрон ва Покистон ҳамчун нозир дар чорабиниҳои ин созмон ширкат мекунанд. Ҳамчунин соли 2009 ҳангоми вохӯрии сарони давлатҳо дар Екатеринбург дар бораи пазируфтани ҷумҳуриҳои Шри – Ланка ва Белорус ҳамчун шарикони Созмон қарор қабул шуда буд.