БЕШ АЗ ДУ МИЛЛИОН КӮДАКОН ЭМ КАРДА ШУДАНД

                 Душанбе, 13 октябр. (АМИТ «Ховар», Ибодат Давлатова). — Беш аз 2 миллиону 200 ҳазор кӯдак дар натиҷаи маъракаи миллии эмкунӣ бар зидди бемориҳои сурхча ва гулафшон, ки 12 октябр дар Тоҷикистон ба анҷом расидааст, эм карда шуданд, иттилоъ дод дар нишати матбуотӣ муовини вазири тандурустии ҶТ Саида Ҷобирова.                 «Бо кӯшишҳои муштараки вазорати тандурустӣ ва шарикони байналмиллалии он беш аз 97 дар сади кӯдакони синну солашон аз 1 то 14 сола дар ҷараёни гузаронидани маърака дар тамоми ҷумҳурӣ ба эмкунӣ фаро гирифта шудаанд», — қайд кард С.Ҷобирова.                   Инчунин, қайд карда шуд, ки он кӯдаконе, ки дар рафти маърака аз сабабҳои гуногун ба эмкунӣ фаро гирифта нашудаанд, то охири моҳи октябр давом меёбад. Аз моҳи ноябри соли равон сар шуда, эмкунии кӯдакон бар зидди бемории гулафшон ба тақвими миллии эмкунӣ ворид карда мешавад.                 Бояд қайд намуд, ки маъракаи эмкунӣ аз тарафи вазорати тандурустӣ дар давоми ду ҳaфта бо дастгирии ЮНИСЕФ ва Ташкилоти умумиҷаҳонии тандурустӣ (ТУТ) дар тамоми кишвар гузаронида шудааст. Эмкунӣ дар беморхонаҳо, мактабҳо, муассисаҳои томактабӣ ва статсионарӣ, дар ноҳияҳои дурдаст бошад бо кӯмаки бригадаҳои сайёр гузаронида шудааст. Дар он беш аз 6 ҳазор кормандони соҳаи тандурустӣ иштирок кардаанд.