Э. РАҲМОН ЛОИҲАИ ҚОНУН «ДАР БОРАИ АВФ» ПЕШНИҲОД ҚАРД

                26 у ми октябри соли 2009 мутобиқи моддаҳои 58 ва 59-и Конститутсияи (Сарқонуни) Ҷумҳурии Тоҷикистон имрӯз аз тарафи Президенти Ҷумҳурии Тоҷикистон лоиҳаи қонуни Ҷумҳурии Тоҷикистон "Дар бораи авф" ба баррасии Маҷлиси намояндагони Маҷлиси Олии Ҷумҳурии Тоҷикистон пешниҳод карда шуд.                 Лоиҳаи қонуни мазкур ба муносибати 15-солагии Конститутсияи Ҷумҳурии Тоҷикистон ва Соли бузургдошти Имоми Аъзам баҳри амалӣ намудани принсипҳои инсонпарварӣ – мадорою муросо, раҳму шавқат, таҳаммулпазирӣ, ки аз таълимоти ин фақеҳи бузурги олами ислом бармеояд, таҳия ва пешниҳод гардидааст.                  Таҳияи лоиҳаи қонуни Ҷумҳурии Тоҷикистон "Дар бораи авф" аз ҷониби Президенти Ҷумҳурии Тоҷикистон дар баробари амалӣ гардонидани меъёрҳои бунёдии Конститутсияи давлати мо яке аз тадбирҳои бевоситаи татбиқи ғояҳои инсондӯстии таълимоти Имоми Аъзам мебошад.                  Конститутсия қонуни асосии давлат ва ҷомеа ба ҳисоб рафта, он сарчашмаи низоми ҳуқуқии Тоҷикистон, муайянкунанда, ҳифз ва кафолатдиҳандаи ҳуқуқу озодиҳои инсон мебошад. Конститутсия инсон ва ҳуқуқу озодиҳои ӯро арзиши олӣ эътироф намудааст ва воқеан амалишавии онҳоро тавассути бевосита амалӣ гардидани меъёрҳои худ таъмин менамояд. Тибқи фармудаҳои Имоми Аъзам, ки аз Қуръони маҷид ва ҳадиси набавӣ бармеоянд, инсон волотарин офаридаи илоҳӣ ба шумор меравад.                 Тоҷикистон ҳамчун давлати демокративу ҳуқуқбунёд ва дунявӣ пайваста барои озодии инсон ва ободии рӯзгори мардум барномаҳои муҳими давлатиро таҳия ва амалӣ менамояд.                   Лоиҳаи қонуни мазкур аз 25 модда иборат буда, нисбати гурӯҳи муайяни ашхоси маҳкумшуда ва шахсоне, ки парвандаи ҷиноятии онҳо дар баррасии мақомоти таҳқиқи ибтидоӣ, тафтишоти пешакӣ ва судҳо қарор дорад, татбиқ мегардад.                    Мувофиқи маълумоти пешакии мақомоти марбута Қонуни мазкур нисбати беш аз 10000 ашхос татбиқ карда мешавад.                   Қонуни Ҷумҳурии Тоҷикистон «Дар бораи авф» нисбати шахсоне татбиқ карда мешавад, ки то мавриди амал қарор гирифтани он ҷиноят содир кардаанд.