МАҲФИЛИ ЁДБУДИ ПӮЛОД ТОЛИС

                 Душанбе, 7 октябр. (АМИТ «Ховар», Таҳмина Ғоибназарова). – Пагоҳ, 8 октябр дар Иттифоқи нависандагони ҷумҳурӣ барои поси хотири нависандаи маъруфи тоҷик Пӯлод Толис маҳфили адабӣ баргузор мегардад.                   Муовини аввали Иттифоқи нависандагон Абдулҳамид Самадов ба АМИТ «Ховар» хабар дод, ки дар маҳфил ҳаводорони эҷодиёти адиби шаҳир ва ҳамсафону шогирдони ӯ иштирок хоҳанд кард. Пӯлод Толис 24 августи соли 1929 дар Хуҷанд таваллуд шудааст. Ӯ баъди хатми мактаби миёна ба факултаи филологияи Донишгоҳи давлатии Тоҷикистон дохил шуд.                    Фаъолияти меҳнатии П.Толис аз ҳуруфчини матбаа оғоз ёфтааст. Ӯ баъдан дар вазифаҳои мудири шӯъбаи рӯзномаи «Ҳақиқати Ленинобод», котиби масъули маҷаллаи «Пионер», муҳаррири Нашриёти давлатии Тоҷикистон ва ғайра кор кардааст.                   Дар Тоҷикистон асарҳои П.Толис «Чароғҳо», «Ҳикояҳо», «Дар», повести «Тобистон» ва ғайра чоп шудаанд.                   П.Толис инчунин тарҷумони бомаҳорат низ буд. Тарҷумаи асарҳои адибони рус А.Герсен, А. Толстой, А.Чехов, М.Горкий ва ғайра ба қалами ӯ тааллуқ доранд.                   Пӯлод Толис моҳи сентябри соли 1961 дар синни 32 — солагии вафот кард.