НАМОЯНДАГОНИ ДУШАНБЕ ДАР НИШАСТИ ЖЕНЕВА ИШТИРОК МЕНАМОЯНД

                  Душанбе, 27 октябр.(АМИТ «Ховар»,Марзия Саидова).-Тақвияти ҳамкории мутақобила ҷиҳати ҳимояи ҳуқуқ ва ташкили шароити зарурӣ барои гурезагон зимни мулоқоти Раиси шаҳри Душанбе Маҳмадсаид Убайдуллоев бо роҳбари намояндагии Раёсати Комиссари Олии Созмони Милали Муттаҳид оид ба умури паноҳандагон дар Тоҷикистон Иля Тодорович дар Душанбе баррасӣ гардид.                  Мусоҳибон нақши сохтори бонуфузи СММ-ро дар расонидани кӯмакҳои башардӯстона ба аҳолии кишварҳои бесубот муҳим арзёбӣ карданд. Ҳамчунин, масъалаҳои мизи мудаввари Комиссари Олии СММ оид ба масъалаҳои паноҳандагон, ки дар мавзуи «Проблемаҳои гуманитарӣ дар чаҳорчӯбаи урбанизатсия ва муколамаи Комиссари Олӣ оид ба масъалаҳои баҳсноки ҳимояи ҳуқуқ», ки 8-10 декабр дар шаҳри Женеваи Шветсария баргузор мешавад, баррасӣ гардиданд.                   Раиси шаҳри Душанбе интихоб ва баррасии мавзуи мизи мудавварро талаботи замон ва ниёзҳои ҷомеаи байналмилалӣ арзёбӣ намуда, гуфт, ки баргузории ин нишаст дар ҳалли проблемаҳои гурезагон, ки бар асари ноооромиҳо бесарпаноҳ мемонанд, нақши муассир хоҳад гузошт.                   Роҳбари намояндагии Раёсати Комиссари Олии СММ оид ба умури паноҳандагон дар Тоҷикистон Иля Тодорович гуфт, ки дар нишасти Женева аз миёни кишварҳои Осиёи Марказӣ шаҳри Душанбе ягона пойтахтест, ки дар он даъват карда шудааст.Зеро пойтахти Тоҷикистон дар ҳалли мушкилоти паноҳандагон собиқаи калон дошта, таҷрибаи Душанбе аз сӯи дигар давлатҳои аъзои СММ мавриди пажӯҳиш ва истифода қарор дода мешавад.