РУШДУ НУМӮИ СОҲАИ МЕЛИОРАТСИЯ ДАР БАДАХШОН

                 Душанбе, 8 октябр. (АМИТ «Ховар», Лаззат Диловарзод).- Дар соли 2009 Раёсати мелиоратсия ва захираҳои оби Вилояти Мухтори кӯҳистони Бадахшон бо мақсади амалӣ намудани дастуру супоришҳои Президенти кишвар — Эмомалӣ Раҳмон дар рушди соҳа, корҳои назаррас анҷом дода шуданд.                 Соли ҷорӣ бо дастгирии Вазорати мелиоратсия ва захираҳои оби ҷумҳурӣ дар ноҳияи Дарвоз 35 ҷӯю каналҳо аз таъмир бароварда шуда мавриди баҳрабардорӣ қарор дода шуданд. Аз ҷумла, барои амалӣ шудани барномаи «СИДА» барои ба истифода додани каналҳои Курговад ва Кеврони ноҳияи Дарвоз аз тарафи Раёсати мелиоратсияи вилоят ба маблағи 6,5 ҳазор сомонӣ маводи сохтмонӣ барои таъмиру ба истифодадиҳии каналҳои мазкур дастрас карда шуд. Раёсати мазкур, барои азхудкунии заминҳои нав дар мавзеи Дашти Лич 170 ҳазор сомонӣ ҷудо намуд. Маблағи мазкур аз тарафи пудратчӣ — идораи сохтмони «Дарвоз» пурра аз худ карда шуд.               — Бо ҷудо намудани маблағи иловагӣ, Раёсати мелиоратсия ва захираҳои оби Бадахшон тайёр аст 50 гектар заминро то рӯзи ҷашни «Ваҳдати миллӣ», ки соли 2010 дар Бадахшон доир мегардад, мавриди истифода қарор диҳад,- иброз дошт сардори раёсати мазкур Баҳодур Сулаймонов ба мухбири АМИТ «Ховар».