МУЛОҚОТ ДАР «АГРОИНВЕСТБОНК»

                  Душанбе, 23 ноябр. (АМИТ «Ховар», Покиза Маҳмадбекова). — 19 ноябр дар Ҷамъияти саҳҳомии «Агроинвестбонк» ба муносибати ба охир расидани мӯҳлати хизмати намояндаи доимии Бонки тармиму таҷдид ва рушди Аврупо дар Тоҷикистон ҷамъомад баргузор гардид. Дар он мудири Бонки тармиму таҷдид ва рушди Аврупо дар мамлакатҳои Осиёи Марказӣ Масару Хонма, роҳбари нави Намояндагии бонк дар Тоҷикистон Улф Хиндстром, роҳбари собиқи намояндагии бонк Дар Тоҷикистон Метю Ле – Блан, корманди калони намояндагии бонки мазкур дар Тоҷикистон Бахтиёр Мансуров ва роҳбарияти «Агронинвестбонк» иштирок доштанд.                   Иҷрокунандаи вазифаи раиси Ҷамъияти саҳҳомии «Агроинвестбонк» Муродҷон Вафоев ба роҳбари собиқи намояндагии Бонки тармиму таҷдид ва рушди Аврупо дар Тоҷикистон Метю Ле – Блан барои саҳми калонаш дар бобати равнақу ривоҷи ҳамкории дуҷонибаи Бонки тармиму таҷдид ва рушди Аврупо бо бонкҳои Тоҷикистон ва хусусан Ҷамъияти саҳҳомии «Агроинвестбонк» миннатдорӣ баён намуд. Вай баъдан намояндаи нави Бонки тармиму таҷдид ва рушди Аврупо дар Тоҷикистон Улф Хиндстромро ба ҳозирон муаррифӣ намуд.