БА ДЕҲҚОНОН 180 МЛН. СОМОНӢ ҚАРЗ ДОДА ШУД

                    Душанбе, 8 декабр. (АМИТ «Ховар», Бекназари Абӯбакр). – Бо Қарори Ҳукумати Ҷумҳурии Тоҷикистон аз 27-уми феврали соли 2009 барои дастгирии молиявӣ, аз ҳисоби депозити буҷаи ҷумҳуриявӣ барои қарздиҳӣ ба хоҷагиҳои деҳқонӣ 180 млн. сомонӣ ҷудо гардидааст, ки дар ин давра аз ҳисоби маблағҳои зикргардида 82,2 млн. сомонӣ барои қарздиҳӣ мавриди истифода қарор гирифтааст.                     Дар Вазорати кишоварзии ҷумҳурӣ ба мухбири АМИТ «Ховар» иттилоъ доданд, ки аз ҳисоби ширкатҳо 10,4 ва худмаблағгузорӣ 22,0 млн. сомонӣ барои парвариши зироатҳои кишоварзӣ маблағгузорӣ карда шуд.                      Мавриди зикр аст, ки соли ҷорӣ аз буҷаи ҷумҳурӣ барои дастгирии соҳаи кишоварзӣ 22 млн. 850 ҳазор сомонӣ, аз он ҷумла барои харидани техникаи кишоварзӣ — 6000,0, барои заҳрхимикатҳо ва мубориза бар зидди касалиҳои чорвою парранда -2300,0, хариди чигити тухмӣ -6000,0, рушди соҳаи занбӯрпарварӣ -300,0, рушди соҳаи қутоспарварӣ -200,0, моҳипарварӣ — 300,0, беҳатар намудани биотехнологияи чорво ва созмон додани бонки нутфаю ҷанин -200,0, рушди зотпарварӣ -200,0, рушди минтақаи чарогоҳои ҷумҳурӣ -300,0 ва сохтмони асосӣ -550 ҳазор сомонӣ ҷудо карда шудааст.