БЕНАЗОРАТИИ НОЗИРОНИ РОҲ

                  Душанбе, 14 декабр. (АМИТ «Ховар», Жасмин Назарова). — Тибқи иттиллои дафтари матбуоти раёсати бозрасии давлатии автомобилии ҷумҳурӣ аз 7 то 13 декабри соли ҷорӣ дар роҳҳои автомобилгарди ҷумҳурӣ 25 ҳодисаи нақлиётӣ ба қайд гирифта шуд. Дар натиҷа 10 нафар ба ҳалокат расида 42 нафар ҷароҳати вазнин бардоштанд.                      Дар шаҳри Хуҷанд ронандаи автомашинаи тамғаи «Дамас» Тойбек Шерхонов ҳангоми ҳаракат бо кӯчаи Ленин аз ӯҳдаи идораи автомашина набаромада пиёдагард Шодимаҳмад Ниёзови 61 соларо зада аз пой меафтонад. Дар натиҷа пиёдагард ҷароҳати ҷисмонӣ гирифта дар беморхона бистарӣ мегардад.                     Инчунин дар ноҳияи Бохтари вилояти Хатлон як садамаи нақлиётии марговар ба қайд гирифта шуд. Ронандаи автомашинаи тамғаи «Мерседес – Бенс» Нурулло Зунаваров ҳангоми ҳаракат бо шоҳроҳи Данғара – Қурғонтеппа ба самти муқобили роҳ баромада ба автомашинаи тамғаи «Донг — Фенг» бармехӯрад. Дар натиҷа ду нафар мусофирони автомашинаи тамғаи «Мерседес – Бенс» ба ҳалокат расида ду нафари дигар ҷароҳати ҷисмонӣ бардошта дар беморхона бистарӣ мегарданд.